لغز عينكي لـ محمد عبدالعزيز الديب

كل ما أبص جوه عنيكي
بألمح طيبة وخضرة ونور
و أنسى ليالي عجاف قضيتها
ويا غربة قلبي البور
و أسأل نفسي سؤال حيرني
خلاني ياما ألف و أدور
لما ده كله جمال إنسية
يبقى إيه بس شكل الحور ؟1

نهر عنيكي...
ميته تشبه مية زمزم
و كل نساء الدنيا صحاري
فأزاي بس هأروح أتيمم
و قصاد عيني النهر الجاري؟!

جوه عنيكي ...
أنا شايف نفسي
شايفني بأقدم خطوة و أخر
جوه عنيكي
أنا شايف يأسي...
بنظرة عينك داب و أتبخر
و فـ لحظة نسيت كل الخوف

بأحمد ربي لإني بحبك
و أحمده أكتر إني بأشوف
ده لولا عنيكي
و تفاح خدك
مكانش بقاله لازمة الشوف

ف عمري الماضي
و عمري الآتي
لغز عنيكي ... لغز حياتي
هفضل عمري ليها اسير
لسه لـ بحر عنيكي العاتي
هفضل أدور على تفسير !!