من غيرعينيها لـ تامر شاكر

طعمه ايه العمر لو من غير عنيها ؟
زي شئ غير مستساغ
بيعه ملهاش أي شاري
لوتبيعها بقرش ساغ

كتله من احساس وناس
فجأه تبقي طيف فراغ

طعمه ايه العمر لو مش هي فيه ؟
زي تيه ..
زي حالة نُص قلب
نصه ضايع مش لاقيه

مش هكابر ..
بعد منها أي واحده معني عابر
رغم كونهم فيهم اللي بلون عنيها
واللي صوتها أو سكوتها
حتي فيه لمسة ايديها
بس برضو مش لاقيها

هي كانت حاله خاصه
طلّعت قلبي المنَصّه
سلطت كاميرات ونور
دوبتني بنُص بصّه
وروحي مش عاشقه الظهور
زي غيري خدت دور
حسّسّتني اني بطلها
رغم اني كنت ليها
حد من ضمن الحضور

ربما كان شئ طبيعي
ان شمسك لما تشرق
فوق ربوعي يبان ربيعي
واني فجأه أكون متيم
وافضل احلم ثم احلم
ثم انك يوم تضيعي

تعمل ايه البنت قوللي بقلب ساكت !!؟
كان هواها نوره ساطع
وانت حبك ضيّ خافت
هي شافت فيك حقيقه
قرّبت كانت جريئه
انت توهت وهي سابت .