تصورني لـ سلمى عصام

تصوَّرني
___________________

كُل شئ قسمة ونصيب "
يعني كَان لازِم يغِيب
القدر نافِذ خلاص
! كُل حَاجة يا بنتي اصلاً
عند ربِك , عِلم غِيب ! "

كُنت بصبُر بِ الكَلام ده
وعايزة لِسة كَلام كتِير
بُعده عني مَكنش إلا
كُل صح وكُل خِير !
فيَّا حَاجة عجُوزة جِداً !
طفلة عَايشَة العُمر شِيب
اعذروني حَتى مرة
بُكايا يومها مَكنش عِيب !!

جوا مِني حَاجَات وتايهَة
جوا مِني حقيقة زايفَة
ضلي ساكِن خوفه مني
ضلي يمكن مِنه خايفَة !

جوا مِني حَاجات مُشابهة
بار بيحلم يبقى مَسجد
شيطان بييجي لمَّا بسجُد
يمنع رُوحي مِ الخشُوع
كُنت شبعانة بِ وجُودك
قلبي رَافِض يُوم يجُوع !

وقفت عَند بَاب الرِيح
بطبطب لسة عَ المجَارِيح
وبرجع كُل يُوم بِجروح
وبفضل بَرضُو افتكرَك
وبفضل برضو جوا سطُوح
يهب الرِيح فيكسرني !
وألِم فِ نفسي بالعافية
وأرجع تاني اعوّرني !
معاك بقيالي كام ذكرى
بتفضل ثابتة فِ ذهني
مبتغيرش مِن حاجة
وجه غيابك فغيرني !
تصوَّرني !!

بقيت بشبه لحُر سجِين !
فبتعوِّد على الزنَازِين
باقيلي فِ الأراضِي كَمِين
باقيلي مِن السما لعنة
وبشبه فِ القدر حوَّا
فببعِد كُل يُوم خطوَة
عَن الجنة !
باقِيلي مِن الكلام جُملة
باقيلي مِن الجُمل اسمَك
وباقي مِن الجرُوح جرحَك
ميتضمِدش حَتى بشَاش
جوَّابك ليَّا لِسة مَجاش
غِيابك فيَّا كَان يوجَع
مَازَال يوجَع ! ..
مَازال صوَّرك بتحضُني
تصوَّرني !

بقِيت عَايشة فِ كُل تَابُوت !
بقيت بملُك دوَّاعي المُوت
وبملُك فِ الضيَّاع خَانة
وليه كُل امَّا بفتكرَك !
بشُوف الدُنيَّا زِنزَانة
واشُوف الدُنيَّا دِي بِتِضْيَّق
وليه دَايماً بقِيت بسرَّق
كَام ضِحكة وكَام بسمَة
فَمَتلِقشِي على الرسمَة
وتِرجع تَاني تكشِيرتِي !
يا حَاططلي الوَّجع آية
وسَاكِن فيَّا رَغم البُعد
ده لوَ تِعرف معَاني الزُهد !!
انا فايتة السنِين لجلك
ولِسة بحَاوِّل اندهلك
برَغم البُعد والمسَافَات
وتملالي البحَار فِ ذنُوب
وبصبُر عَ الوَّجع اوقات
ومهما يعني كُنت اصبُر
مَجِيش حَاجة قُصَاد ايٌوب
يارب انا نفسي مَرة اتُوب
او اكفُر حَتى عَن حُبه !

بقالي كتير هِنا قَاعدة
بفكر فِ اللي رَاح مِني
فصدقنِي !
انا بكتب الجوَّابات
ودمُوعي مِغرقة عِيني
مَفيش ولا شِئ ينسِيني !
بمُوت دَايماً مِن الفُرقة
وجُودك بَس يحييني !
وهبعتلك الخِطاب الألف !
وهحطُه عَند مَقبرتَك
يارِيت بس اما تقراهُم
تجيلي مَرة فِ منامي
وتنده مَرة على اسمي
ده اسمي كتير بيشتاقلك
يا سَاكن جوَّا مَقبرتك
وناسي الدُنيَّا والملكُوت
اكِيد حِلو ولذيذ المُوت
لكنه بيبعِدك عَني !
ببص للمرايا واشوف
مَلامحَك سَاكنة فِ ملامحِي
تصوَّرني !!

#سلمى_عصام .. 

أهداء الي #أخي_رحمه_الله