محكمة لـ محمد الحويف

 

" محكمة " . .

- إثبت حضور المُتهم .

- المُتهم غايب بروحه . .
بس حاضر بجسمه
" مش فاكر" كانت رده . .
لما سألناه عن اسمه .

- نادي علي قضيته .

- وبحضور المُتهم . . نبدأ جلسته
القضية قتل . . والضحية ضحكته .

- فلتتفضل النيابة .

- سيدي القاضي إن المُتهم
قد قتل الضحكة عمداً
سيدي القاضي إن المُتهم
قد عاش حياته كمداً
ولم يبتسم منذ زمن
سيدي القاضي إن المُتُهم
يجب أن يدفع الثمن
سيدي القاضي إنا نُطالب
بتوقيع أقصي أنواع العقاب
علي رجلٍ عاش زمناً
لم يحسب للضحكة حساب
وقتل كُل فرحة عمداً
وأغلق في وجه البسمة الباب .

- فليتفضل المُتهم .

- سيدي القاضي هأضحك إزاي
وأخويا لسه شهيد جديد
ماكملش في تُربته سنة
سيدي القاضي هأضحك إزاي
وهجيب منين أسباب للهنا
أنا كل ما أحلم بحاجة بشوفها
بتتحقق . . بس مش ليا أنا
سيدي القاضي هأضحك إزاي
وأمي صوت ضحكتها بيبكي
وكتف صاحبي م السندة عليه إتهد
سيدي القاضي أنا كل ما بأحكي . .
صدقني مش بألاقي حد
سيدي القاضي هأضحك إزاي
وأبويا بطل يجيلي في الحلم
ثم هتفيد الضحكة بإيه . .
في دُنيا عبارة عن فيلم
والكُل بيضحك فيها تمثيل
سيدي القاضي أنا نفسي . .
أضحك ضحكة بدون تجميل .

- حكمت المحكمة بالبراءة . .
من جميع التُهم المنسوبة
حيث تبين أن الضحكة . .
ماتت علي أمرها مغلوبة .

محمد الحويف .