هسكت والبس طربوش لـ رنا سالم

قلت أنا عايش من باب الفرض
و حسبتها بالطول و العرض
ايه مات فيا .. و ايه مازال فيه النبض
سحبت من حظ الدنيا كام قرض

أنا إيه .. أنا مين على وش الأرض
....................................
أنا عندى بصر بس أعمى
و العمىَ بقى أكبر نعمة
ماهو لما هعيش فى العتمة
عن ظلمى أنا مش هتغمىَ
وأقول أصلى مشوفتوش
و الوجع أصلى مدوقتوش
و الذل أصلى معشتوش
لما أبذل كل ما عندى
و أنزل تانى على فشوش
لما ناسى يتقلبوا ضدى
و فى لحظة يبقوا وحوش
و أما فجاة أبطل أدى
بدل الوش ألقى وشوش
لو عايش غلبان على أدى
أبقى بطيبتى غبى و مغشوش
و لو عشت أنانى و مادى
يتقال غير رزقك مش هتحوش
و عشان لؤمة العيش
تتحمل من له و ملوش
يعملوا ما بدالهم فيك
ترضى و ب وش بشوش
يرمولك حبة فكة
فى زمننا ييجوا قروش
يخلصوا من أول تكة
ع العيشة مبيكفوش
و ازاى راح تبدأ سكة
بتبنيها بكام ملطوش
........................................
أبويا قالى " أنا مين "
دة سؤال متسألهوش
تهت شمال و يمين
و برضه مصدقتوش
سألت سؤال لسنين
و جوابه ملاقيتهوش
.............................
طب ليه الناس ساكتين !!
لابسين طربوش الجهل
عايشين دور المساكين
راضيين بلسع النحل
و يقولوا أدينا عايشين
الصعب زى السهل
ما هو للتراب راجعين
..................................
دنيتهم هارياهم سحل
و أنا واحد من الضايعين
مش هسأل إيه الحل
مش هسأل تانى أنا مين
هعيش زى العايشين
هسكت و ألبس طربوش .