خازوق لصلاح عبد الله

 

خازوق.
مبروك ليك يا رئيسنا يا ذوق...
خدتوا براءة وخدنا خازوق...
تحت الجزمة الثورة وناسها...
وأنت وكل صحابك فوق...
يعني النايم لازم يصحى...
والسكران يعقل ويفوق...
أبكي على إخواتي إلى انداسوا...

ولا على الوطن المسروق!!...
مش حكم القاضي يادوب قاله...
لا. دي حكاية عصر بحاله...
نضف القاتل من أوحاله...
والمقتول هو المحقوق!!...
بعد ما نط عليها حبايبه...
لازم طبعا ياخد نايبه...
يلهط هو وكل قرايبه...
يلهط قوي مش بس يدوق!!...
أم الثورة على الحرية...
زاطت. رجعت زي ما هي...
ارقعي زغروطة يا حسنية...
وارقص م الفرحة يا زقزوق!!...
على فين ناوي يا مصري تخطي...
ما بقاش شغل على المتغطي...
المطلوب إن أنت توطي...
والفرعون يركب ويسوق!!...
وأخيرا نجح التخطيط...
وشربت المقلب يا عبيط...
دب براسك أتخن حيط...
واتعصب أو موت مخنوق!!...
ثورة إيه ياد يا ابن الخايبة!!!...
بلدك ليها صحاب مش سايبة...
غير حسني وشلته مش جايبة...
ومفيش بينهم أي فروق!!...
وحسين سالم سيد الكل...
راجع بكرة عليكو يطل...
وأنت يا حر في بعضك كل...
مصر خلاص اتقلبت سوق!!...
سوق ودلالة قرب. قرب...
بص على السحر المتجرب...
على إيد إعلامنا المتدرب...
شجر الصمغ طرح برقوق!!!...
بانت يا أسيادنا الهليبة...
ولا عاد فيها حاجة غريبة...
المحاسيب هما الكسيبة...
والقابض هو المزقوق...
وأنت يا ثوري يا أس بلاوي...
ليه صدقت؟ إكمنك هاوي...
إزاي تطمن للحاوي...
والتعبان جوا الصندوق!!!...
اعقل يا ابني وربي عيالك...
وكفاية كل إلي جرا لك...
إيوة أنت عملت إلي في بالك...
بس إلي اتبعتر ملحوق!!...
إحنا بتوع السكة العوجة...
والبحر المليان بالهوجة...
عندنا للثوريين موجة...
ولحبايبنا عندنا طوق...
وحياة الدم المهدور...
بسنان الكلب المسعور...
بكرة تهد عليكو الصور...
صرخة من القلب المشقوق...
خلوا الغنا يكتر ويزيد...
اعملوا كل دقيقتين عيد...
هيصوا خالص. بس أكيد...
بعد الضلمة هاييجي شروق...