انا صادق في صفاتي لـ ريم حواس
انا اتعس واحد ف الكون
انا اكتر انسان محظوظ
مش عايز من حد فلوس
وكفانى من الدنيا دروس
أنا طاير حر ف أحلامى
مع إن الواقع محبوس
أنا شايف النور قدامى
مع إنى مغمض م الخوف
الدنيا بتشترى فى ميزاتى
وتدينى بالباقى عيوب
عمالة تدوب ف ملامحى
وتنقص من نور ضحكاتى
وتسيبنى مكشر معيوب
أنا عمرى شباب اوى وصغير
وعجوز من جوا وكركوب
أنا عندى رسايل م الغيب
وأنا جاهل جدا بقيمتها
بستنصح للناس واساعدها
واستغبى لنفسى واضيعها
وبحارب ف الظلم تملى
وانا أكتر واحد بظلمنى
انا ناجح جدا ومؤدب
وانا فاشل ف تجاربى وبكدب
أنا اكتر شخصية قوية
وانا ساذج ف الحب وبضعف
أنا عاقل جدا وكبير
ومراهق جدا وصغير
انا بعرف امثل واحبكها
أنا صادق ف صفاتى ونقيضها
