مشهد لـ وفاء مصباح

مشهد و لونه سواد ..
و الوقت واقف حداد ..
كل العيون في الارض ..
و الحزن صبح الفرض ..

و الدموع ع الوشوش ..
حفرت بحور ..
و الخدود باتت تبوش ..
صمت البكا قاتل ..
الم الفراق عازل ..
بين الحياة و الموت ..

كل القلوب دابت ..
كل العقول راحت ..
مع ناس مشيت و سابت ..
من غير كلمة وداع ..
من غير حضن اخير ..
يتحكي فيه كتير ..
و يقول اللي جواه ..

و وصل النعش ! ..
و م الوجع ..
اتعصر القلب و اتنفض ..
و العقل رفض ..
رفض يصدق الدموع ..
رفض يصدق ..
ان خلاص مفيش دموع ..
مفيش حنان ..
مفيش احساس بالامان ..

و جه وقت الصلاة ..
صف ورا صف ورا صف ..
تكبيرة ورا تكبيرة ورا تكبيرة ..
و العقل لسه تايه ..
و القلب لسه مقبوض ..
و كل الحاصل مرفوض ..

و جه وقت الدفن ..
مكان غريب ..
احساسه مريب ..
و جموع كتير بتعزف صوت الوجع ..
مات الحي و لاصله رجع ..
و فات الدنيا و البدع ..
و فات قلوب عايشة ف وجع ..

و جه الليل ..
كمل سواد المشهد ..
و رجع ذكريات عمر فات ..
انتهت بالممات ..