حوا لــ آلاء الشافعي

حابب محبوب يمكن مغلوب
علي امره.. ومش عارف ماله (و) !
كاره مكروه يمكن أسروه
علي فِكرُه.. فاضل علي حالُه (و) !
عايش متعاش يمكن بالشاش

حزنان باكي ع اللي جراله (و) !
حابس محبوس قاعد في فانوس
قام متعفرت لما نداله (و) !
انا 100 مليون رسمة وصورة
محبوسة في قلب حيطان السجن ..
انا فكرة اتخلقت حرية
بس حابسها اللي اسمه الجُبن ..
انا 100 عفريت قاعد في فانوس
مستني الحرية م الانس
انا فرق اللون مع فرق الجنس
....... !
ايوة انا الحُر
أنا دوقت المُر
أنا حرف اتكسّر 100 حتة
انا ألف طريق أنا 100 سِكة
لكن مقفولة بتفكيركم .. !
انا بنت ف انوثتها اتهانت
فبتتكلم بمُذَكركم.. !
انا كل مشكلتي معاكوا
بتبصوا عليّا من برة ..
ومحدش فكر يفهمني ..
يعرفني اكتر من جوا ..
كل المشكلة ..
إن انا حوا ...!