استئناف لـ علي نمر

اللى ياما حلمت بيه
اللى كان اليأس فاصل ومداريه
وفـ عينيك الدنيا ضلمه
وفـ عينيك الخلق ظالمه
كنت فاكر إن حكمك فيه نهائي
من سكات
سبت حلم العمر فات
سبت أملك للممات
قمت فجأه حاولت تأنى
قلت ترمى جواب حياتك
جوه صندوق الزمن

أصل حكم العقل عارف

إن برضو مافيش خساره
ومـ الشطاره
لما يحكم حكم زمنك بالوعيد
كن عنيد
كن فـ أول صف يطعن من جديد
كن فـ أول صف يخرج للقتال
أوكن شهيد
لو كنت يوم راح تتقتل
لو كنت تملك ألف روح
ضحى بأرواحك سبيل
انك تغنى غنوتك
لو كل مره تموتك
نفس المواجهة والحروب
أبعث فـ جسد اليأس روح
حارب وقاتل وانهزم
بس التزم
إنك ماتترك يوم ميدان الحرب لازم تبتسم
غير وأخر نقطه من دمك تناضل
فوق جبين الحلم ناويه تترسم