الحب مش كلمة لـ رنا أحمد سالم

الحب مش كلمة و السلام
فى قانونى الحب إهتمام
جواه النار تنبض سلام

عيون بتقول كل الكلام
عقارب ساعة تجرى أوام
و روح تتمنى سنين قدام
الحب ذنب إستحالة يتوب
مهما قابل من ملام
بتعيش فيه حرب وفجأة تدوب
جوة أحضان الوئام
يحكم عقول .. يملك قلوب
وجنونه يصاحب الأيام
طيشه يزلزل جبال و دروب
كخيل جامح ملهوش زمام
تتحول طفل ما بين إيديه
بعناد يشاكس الإنسجام
يقسى و برضه تدور عليه
و غرورك رافض الإنهزام
مرة تسلم لكل ما فيه
و مرة تقاوم الإستسلام
ترتاح من غير إزاى و ليه
تهوى العذاب .. تغوى الآلام
تبقى له أسير مع إنك حر
يسكن وياك كل الأحلام
الحب هو الشهد المر
شمس و داب فيها برد الظلام
#رنا_أحمد_سالم