صدقيني لـ وفاء مصباح

صدقيني ..
انا هنا مرتاح ..
مش ناسيكي ..
انا فاكر ..

فاكر اول مرة شوفتك و خطفتيني ..
خطفتيني بعفويتك و عقلك ..
بجمالك و جرأتك و ادبك ..
فاكر اول مرة اتكلمنا ..
فاكر اول مرة اتصارحنا ..
فاكر كسوفك و حمرة خدودك ..
فاكر حتي لهفة عيونك ..
فاكر خوفك عليا ..
و كل كلمة اتقالت بيننا ..
فاكر اول بحبك سمعتها ..
فاكر حتي اما جريتي وقتها ..
فاكر البنت اللي كانت عاوزة تاخدني منك ..
و اما انتي قولتي مفيش غيري في قلبك ..
فاكر الولد اللي كان بيراقبك ..
و اما انتي قولتي عيني متشوفش غيرك ..
فاكر اول هدية ..
كنتي خايفة متعجبنيش ..
معلش اصلك متعرفيش ..
انتي اصلا الهدية ..
فاكر اما حلمنا مع القمر ..
ميفرقناش غير الموت و اهو حصل ..
انا جيتلك دلوقتي و هفضل اجيلك ..
لو سبتك في الدنيا في احلامك مش هسيبك ..

صدقني انت ..
انا عمري ما انساك ..
انا حياتي بقت هي ذكرياتي معاك ..
فاكرة ضحكتك اللي كانت شمسي ..
فاكرة عصبيتك اللي كانت تطمني ..
فاكرة عيونك اللي كانت بحور ..
ابص فيهم و اسرح و ادور ..
فاكرة اما كنت تقول انتي بنتي ..
فاكرة اما كنت اقول انت راحتي ..
فاكرة غيرتك اللي تفرح ..
فاكرة طيبتك اللي عمرها ما تجرح ..
فاكرة اما كنت اعيط و تقولي دمعتك بتغرقني ..
فاكرة اما تعبت و دمك بقي في دمي ..
فاكرة اما كنت تسرح في ضحكتي و اتكسف ..
فاكرة اخر مرة اما سبتك ..
كان قلبك حاسس و انت بتقولها ..
اخر هتوحشيني بدمعة ..
اول ما خرجت من اوضتك ..
سمعت صوت الاجهزة ..
بتقولي خلاص سبقك للجنة ..
من يومها علي لساني دعوة ..
ربنا يجمعني بيك في الاخرة ..
و هفضل بضحكتي لحد ما اجيلك ..
ما انت عايش فيا و انا عايشة بيك ..